இன்சூரன்ஸ் Corporate நிறுவனம் ஒன்றைச்சுற்றியே கதையமைக்கப்பட்டுள்ளது. வாடிக்கையாளர்கள்தான் பெரிய சொத்து அவர்களை நன்றாக கவனிக்க வேண்டும் எனச்சொல்லிக்கொண்டு, அவர்களுக்கு கிடைக்கவேண்டிய நலன்களையும் வசதிகளையும் கிடைக்காமல் செய்து அவர்களை எவ்வாறு கசக்கி பிழிகிறார்கள் இந்த Corporate நிறுவனங்களின் உயர் மட்டத்தினர் என்பதை அழகாக பதிவு செய்கிறது இப்படம்.
இன்சூரன்ஸ் நிறுவனத்தின் புதிய விற்பனை பிரதிநிதியாக மம்மூட்டி. இளைஞர்களுக்கு கிடைக்கவேண்டிய வேலையை மத்திய வயதை கடந்த நிலையிலும் போராடி பெறுவதும், மாத விறபனை இலக்கை அடைவதற்கு அலைவதும், நிறுவனத்தில் வாடிக்கையாளர்களுக்கு நடக்கும் அநீதிகளை கண்டு மனம் வெம்புவதும், மனைவி ஆசைப்படி எப்படியாவது சொந்த வீடொன்றை வாங்க வேண்டும் என்ற குடும்ப தலைவனாகவும், தன் மகனுக்கு சிறந்த தந்தையாகவும் மாத சம்பளத்தை மட்டுமே நம்பி குடும்பம் நடத்தும் நடுத்தர வர்க்க மனிதராக சிறப்பாகவே நடித்திருக்கிறார் மம்மூட்டி.
அதே நிறுவனத்தில் விற்பனை முகாமையாளராக பஹாத் பாசில்.. அவருக்கே உரித்தான இது போன்ற பாத்திரங்களை அசால்ட்டாக செய்கிறார் பஹாத். லாபம் மட்டுமே நோக்காக கொண்ட ஒரு நிறுவன முகாமையாளர் எவ்வாறெல்லாம் நடந்துகொள்வார் அவரின் உடல்மொழி, பேச்சு எப்பிடியிருக்கும் என உள்வாங்கி செய்திருக்கிறார்.. நாயக அந்தஸ்துடன் மட்டும்தான் நடிப்பேன் என அடம்பிடிக்காமல் தனக்கு கிடைக்கும் எதிர்மறை கதாபாத்திரங்களிலும் வெளுத்து வாங்குகிறார். புதியதாக வரும் அவரின் எல்லா படங்களையும் தேடிப்பார்க்கும் ஆவலை ஏற்படுத்துகிறது அவரின் நடிப்பு!
ஜோர்ஜ் க்ளூனி நடித்த up in the air திரைப்படத்தில் எப்படி ஊழியர்களை “downsizer” (Job Killers) என்று சொல்லப்படும் HR கன்சல்டன்ட் மூலம் வேலையை விட்டு தூக்குகிறார்களோ அதே போன்றதொரு காட்சி இதிலும் உண்டு. தனியார் Corporate நிறுவனங்கள் ஊழியர்களுக்கு எவ்வாறு மன அழுத்தங்களை ஏற்படுத்துகிறார்கள் எந்த நேரத்திலும் வேலை பறிபோகும் என்ற நிச்சயமற்ற தன்னையை ஏற்படுத்தி வேலை வாங்குகிறார்கள் என்பதை அருமையாக காட்சிப்படுத்தியிருக்கிறார்கள். முடிவு சினிமாத்தனமாக இருந்தாலும் சிறந்த திரைப்படம் ஒன்றை பார்த்த திருப்தி மட்டும் மிஞ்சுகிறது.